උදයංග වීරතුංග රැගෙන ඒමට නිලධාරීන් ඩුබායි යයි.


ඩුබායි ගුවන්තොටුපොළේ දී එරට ආගමන විගමන බලධාරීන් විසින් අත්අඩංගුවට ගෙන සිටි රුසියාවේ හිටපු ශි‍්‍ර ලංකා තානාපති උදයංග වීරතුංග මෙරටට රැගෙන ඒමට පොලිස් හා රජයේ නිලධාරීන් ඇතුළත් හත් දෙනකුගෙන් සමන්විත කණ්ඩායමක් අද (07) රාත්‍රියේ අබුඩාබි නුවර බලා පිටත්ව යාමට නියමිත බව පොලිස් මුලස්ථානය ප්‍රකාශ කරයි.


මෙම පිරිස සදහා නීතිපති දෙපාර්තමේන්තුවේ ජ්‍යෙෂ්ඨ නිලධාරීන් දෙදෙනෙක්, අපරාධ පරීක්ෂන දෙපාර්තමේන්තුවේ නිලධාරීන් දෙදෙනෙක්, මුල්‍ය අපරාධ කොට්ඨාසයේ නිලධාරියෙක් හා විදේශ කටයුතු අමාත්‍යාංශයේ නිලධාරියෙක් ද සිටින බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා පැවසීය.


මෙම නිලධාරීන් අබුඩාබි හි දී රාජතාන්ති‍්‍රක මට්ටමින් එරට බලධාරීන් සමඟ මේ සම්බන්ධයෙන් සාකච්ඡා පවත්වා සැකකාර උදයංග වීරතුංග මෙරට රැගෙන ඒමට නියමිත බවද පොලිස් මාධ්‍ය ප‍්‍රකාශකවරයා සඳහන් කළේය.


උදයංග වීරතුංග සිය පවුලේ අය සමඟ ඇමැරිකාව බලා යාමට උත්සහ කිරීමේ දී ඩුබායි ගුවන්තොට පර්යන්තයේ දී ඉකුත් (04) වැනි දින අලුයම එරට ආගමන විගමන නිලධාරිහු ඔහු අත්අඩංගුවට ගත්හ. ඔහු දැනට අබුඩාබි නුවර රදවාගෙන සිටියි.







Comments

Leave your comment